على العلم اللي تعلمناه وعلى هالثقافة ..

نشوف بعض الناس يتكلمون عن :

- الزار .

- شعرة النحاسة .

والامور الاخرى الغريبة اللي تعرفونها او سمعتوا عنها ..

هناك فئة تصدق هالسوالف ..

يعني لو شخص مريض ما خلى لا دختر ولا مستشفيات ..

حام كل الدول ورجع لاهله بعده مريض وعثران ..

يطلع لك واحد من تحت الارض مخه تنك يقول له :

ما سمعت عن فلان .. معروف انه من دقه او ليله بيخليك حصان .. بس هااااا تحمل اذا بغا منك شي عطه .. لان هب هو اللي يبا الاشيا .. الارضيين يطلبون .. وعسب يطلعهم لازم ترضيهم .

المهم صاحبنا يسير عند ابو الزيارين اللي يسمونه ( بابا ) اذا كان ريال .. و ( ماما ) اذا كانت حرمه ..

يعني تزقر فلان بـــ ( بابا خماس ) أو ( ماما حليمة ) .

المهم وصل صاحبنا ودش عالبابا يوم يشوفه يقول : كل هذا فيك ؟

هني الاخ يرتجف ويقول : شو هناك ؟؟ ومنو اللي فيه ؟

يرد عليه وهو معصب : لا تقاطعني .. انا بفكك منهم .. ولكن لازم نسوي لك ليلتين عسب نظهرهم ..

ويسال الاخ : شو طلباتهم ؟

يرد البابا على حسب الطلب اللي يباه : ممكن ( عجل .. تيس .. ديك له مواصفات غريبة .. )

وساعات يطلبون ذهب او فضة او فلووووووس .

وتبدأ الليلة ويعدون العدة .. رياييل وحريم .. ويجهزون الطبول والفحم والدخون واللبان ..

يدقون ويدقون .. وكل حد يرتعش .. واللي يصرخ .. وكلهم مع بعض ( استغفر الله ) .:(7flh

اللي يطيح مني واللي يدق راسه مناك ( حشا ما تصيبهم اعصبه ) ..

ويقوم البابا ويعطي المريض بخيزرانته على ظهره .. او يضربه أكثر من مرة ( يستاهل ) .. ):

اوين البابا يالس يضرب الجني اللي متعلق وهب طايع يظهر .. والمريض الفقير هو اللي يتوجع .

وبعض اصحاب الزيارين يطلبون من المريض يشرب دم الذبيحة .. او يدهن نفسه ( شو مغولي ) .

او يطلب امور غريبة ما اتذكرها ..

المهم رجع صاحبنا من رحلة الضرب .. بعضهم يتوهمون انهم بخير .. وبعضهم عقب كم يوم يسافرون
( الى رحمة الله ) .

وشعرة النحاسة هب بعيدة عن القصة ..

سمعت من وحدة ان من كثر ما عقدوها انها نحسة ..

استسلمت وسارت عن وحدة توسم ..

المهم يوم دشت البنت عالحرمة قالت لها :

افففف افففف كل هالنحاسة فيج ( اونها شاطرة .. أكيد اللي بتي عندج تبا تعالجينها من النحاسة )

المهم تكتشف الحرمة وتعرف مكان الشعرة اللي تييب النحاسة ..

او يمكن ما توجد شعرة لكن البنت نحسة ..

المهم تقوم الحرمة وتوسم البنت او الريال بين صبع رجله العود والصغير ..او بين حواجبه ..

ولكن في ايامنا ودروا يوسمون فالاماكن الباينه ..

والله عجب اني اسمع عن هالامور في ايامنا ..

ونحن عندنا كتاب الله فيه شفاء …

بس الاحباط .. والملل .. يخلي المتعلم ينسى علمه .. المهم عنده يشفى من علته ..

ويه اخاف عن يسمعوني .. بشرد عنهم ..

ودمتم …